गुलरिया । बर्दियाको गुलरिया नगरपालिका वडा नम्बर ५ स्थित बालापुरको खेल मैदानमा बिहिबारदेखि प्रथम फूलबारी कप फूटवल प्रतियोगिता शुरु भएको छ । सामाजिक चेतना, स्वाभिमान, विकास र परिवर्तन हाम्रो महिचान भन्ने नारासहित फूलवारी युवा क्लव गुलरियाको आयोजनामा प्रतियोगिता शुरु गरिएको छ ।

गुलरिया नगरपालिकाकी उपप्रमुख सावित्रा गौतमले फिल्डमा रिवन काटेर उद्घाटन गर्नु भएको खेलमा रेफ्रीलाई बल हस्तान्तरण गरेपछि खेल शुरु गरिएको हो । पहिलो खेल सुहेलवा र बालापुर विच प्रतिस्पर्धा भएको छ । सुहेलवाले शून्यका बिरुद्ध २ गोलगरी बालापुरलाई पराजीत गरेको छ । शुक्रबार नेपालगञ्ज विशेष प्रहरी सुरक्षा बल र गेरुवा विच तथा डफैया र एफसी बर्दिया बिच प्रतिस्पर्धा हुने जनाईएको छ । प्रमुख अतिथी गौतमले युवाहरुले गर्ने खेलकुदका कार्यक्रम सफल बनाउन गुलरिया नगरपालिकाले खेलकुद संयोजक नै तोकेको बताउनु भएको छ ।

उद्घाटन कार्यक्रममा थारु नृत्यांगना सोनु कुस्मीले थारु नृत्य प्रस्तुत गर्नुभएको थियो । त्यसपछि स्थानिय कलाकारहरुले पनि नृत्य प्रस्तुत गरेका थिए । । खेलका लागि गुलरिया नगरपालिका वडा नम्बर १, ४, ५, ६ र ८ ले आर्थिक सहयोग गरेको फूलबारी क्लवका अध्यक्ष आदर्श शर्माले जानकारी दिनुभयो । खेलका लागि १४ वटा टीम दर्ता भएका छन् । प्रतियोगितामा चुरेकुञ्ज डटकम मिडिया पार्टनर रहेको जनाईएको छ ।